ខណ្ឌសែនសុខ ៖ បុរសម្នាក់ បានបាត់បង់ជីវិត ដោយសាររថយន្ដ ក្រឡុកសុីម៉ងត៍ មួយគ្រឿង បួងចង្កូតបត់មិនប្រយ័ត្ន ជ្រុលទៅបុក និងកិនពីលើ ពេលកំពុងឈប់ម៉ូតូ រង់ចាំភ្លើងស្ដុប អូសជាច្រើនម៉ែត្រ បង្កការភ្ញាក់ផ្អើល កាលពីវេលាម៉ោង ៩នឹង៤០ នាទី យប់ថ្ងៃទី១៦ ខែមករា ឆ្នាំ២០២៥ ត្រង់ចំណុចស្តុប៩២ កែងផ្លូវភ្នំពេញ ហាណូយ ស្ថិតក្នុងសង្កាត់ឃ្មួញ ខណ្ឌសែនសុខ ។

មុនពេលកើតហេតុ គេឃើញបុរសរងគ្រោះ ជិះម៉ូតូមួយគ្រឿង ម៉ាកហុងដាឌ្រីម ស៊េរី២០១៩ ពណ៌ខ្មៅ ពាក់ផ្លាកលេខ កំពង់ចាម 1V-5865 ធ្វើដំណើរតាមបណ្តោយផ្លូវ លេខ៩២ ទិសដៅពីកើតមកលិច ក៏បានឈប់រង់ចាំភ្លើងស្តុប ស្រាប់តែមានរថយន្ត ប្រភេទក្រឡុកសុីម៉ងត៍ មួយគ្រឿង ពណ៌លឿងលាយស ពាក់ផ្លាកលេខ ភ្នំពេញ 5A-1409 បើកបរដោយបុរសម្នាក់ ធ្វើដំណើរស្របទិសគ្នា មកពីខាងក្រោយ បួងចង្កូតបត់ឆ្វេង ឆ្ពោះទៅតាមផ្លូវ ភ្នំពេញ ហាណូយ តែមិនបានមើលមុខ ស្រាប់តែបុកពីក្រោយ ម៉ូតូជនរងគ្រោះ រួចកិនពីលើអូសទៅមុខជាច្រើនម៉ែត្រ បណ្តាលឲ្យបុរសជាម្ចាស់ម៉ូតូ ស្លាប់នៅក្រោមកង់រថយន្ត យ៉ាងរន្ធត់៕