ខណ្ឌដង្កោ ៖ បុរសម្នាក់ បានស្លាប់បាត់បង់ជីវិត នៅតាមផ្លូវ ពេលកំពុងដឹកតាមម៉ូតូកង់បី យកទៅមន្ទីរពេទ្យ បន្ទាប់ពីជិះម៉ូតូចេញពីធ្វើការ ត្រឡប់ទៅផ្ទះជួលវិញ មិនប្រយ័ត្ន ជ្រុលទៅបុកខឿនផ្លូវ កាលពីវេលាម៉ោង ៩:៣០ នាទីយប់ ថ្ងៃទី១៨ ខែធ្នូ ឆ្នាំ២០២៤ ស្ថិតនៅតាមបណ្ដោយផ្លូវក្នុងរោងចក្រ សង្កាត់ពងទឹក ខណ្ឌដង្កោ រាជធានីភ្នំពេញ ។

សពជនរងគ្រោះ មានឈ្មោះ រស់ វណ្ណៈ ភេទប្រុស អាយុ ៤១ឆ្នាំ បច្ចុប្បន្នរស់នៅផ្ទះជួល ក្នុងភូមិត្រពាំងជ្រៃ សង្កាត់កាកាបទី២ ខណ្ឌពោធិ៍សែនជ័យ មានស្រុកកំណើត នៅភូមិកំពង់រាបក្រោម ឃុំកំពង់រាប ស្រុកកោះសូទិន ខេត្តកំពង់ចាម។ ជនរងគ្រោះ ជិះម៉ូតូម៉ាក ហុងដា CPX ពណ៌ស ពាក់ស្លាកលេខ ភ្នំពេញ 1IQ-3248 ចេញពីកន្លែងធ្វើការ ឆ្ពោះទៅផ្លូវជាតិលេខ៣ ក្នុងទិសដៅពីកើតទៅលិច ដោយល្បឿនលឿន ស្រាប់តែឡេីងលើពំនូកថ្មទទឹងផ្លូវ ជ្រុលទៅបុកខឿនផ្លូវ បណ្តាលឲ្យដួលបោកក្បាល រងរបួសធ្ងន់ធ្ងរ និងបានស្លាប់ពេលកំពុងបញ្ជូនទៅពេទ្យ៕