ខណ្ឌឬស្សីកែវ ៖ រថយន្តម៉ាក សាំងយ៉ុង ដឹកអ្នកដំណើរមួយគ្រឿង បានបុករបាំងថ្ម ពុះចែកទ្រូងផ្លូវពេញទំហឹង បណ្ដាលឲ្យខ្ទាតទៅប៉ះ បុរសម្នាក់កំពុងជិះម៉ូតូ ដួលរងរបួសធ្ងន់ និងមានរថយន្តដឹកទឹកកកមួយគ្រឿង ទៅបុកទ្រូងផ្លូវបន្ថែម រងការខូចខាត កាលពីវេលាម៉ោង ៥និង៣០ នាទីព្រឹក ថ្ងៃទី២៨ ខែតុលា ឆ្នាំ២០២៤ នៅមុខរោងចក្រ កាត់ដេរសម្លៀកបំពាក់ សផ្លេនឌើរអ៊ីនឌីសស្ទ្រី តាមបណ្ដោយផ្លូវជាតិលេខ៥ ក្នុងសង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ ។

មុនកើតហេតុ គេឃើញរថយន្ត ម៉ាក សាំងយ៉ុង ដឹកអ្នកដំណើរ ពណ៌ស ពាក់ផ្លាក លេខភ្នំពេញ 2AH-2805 បើកតាមបណ្ដោយផ្លូវជាតិលេខ៥ ទិសដៅពីជើងមកត្បូង ក្នុងល្បឿនលឿន បានបុករបាំងថ្ម ពុះចែកទ្រូងផ្លូវពេញទំហឹង បណ្ដាលឲ្យរបាំងថ្ម មួយកង់ខ្ទាតជិតពាក់កណ្ដាលផ្លូវម្ខាងទៀត ស្របពេលនោះ ក៏មានបុរសម្នាក់ ជិះម៉ូតូមួយគ្រឿង ម៉ាក YAMAHA PG-1 ពណ៌ប្រផេះ ផ្លាកលេខ ភ្នំពេញ 1KW-3277 តាមបណ្ដោយផ្លូវជាតិលេខ៥ ទិសដៅពីត្បូងមកជើង ក្នុងល្បឿនលឿន ក៏បុករបាំងថ្ម ដែលខ្ទាតមកជិតកណ្ដាលផ្លូវ បណ្ដាលឲ្យម៉ូតូដួលរ ងការខូចខាតយ៉ាងដំណំ និងម្ចាស់រងរបួសធ្ងន់៕