ខណ្ឌជ្រោយចង្វា ៖ បុរសជាអ្នកដឹកជញ្ជូនម្នាក់ បានស្លាប់នៅកន្លែងកើតហេតុ ករណីគ្រោះថ្នាក់ចរាចរណ៍ រថយន្តបុកជាមួយម៉ូតូ ពេលមេឃកំពុងភ្លៀង បង្កការភ្ញាក់ផ្អើល កាលពីវេលាម៉ោង ១០ យប់ ថ្ងៃទី២៣ ខែតុលា ឆ្នាំ២០២៤ ស្ថិតនៅត្រើយម្ខាង ជ្រោយចង្វា ផ្លូវមាត់ទន្លេ ក្នុងសង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ ។

មុនពេលកើតហេតុ គេឃើញរថយន្ត និងម៉ូតូធ្វើដំណើរក្នុងទិសដៅបញ្រ្ចាសគ្នា ដោយរថយន្តម៉ាក MG ពណ៌ស ពាក់ផ្លាកលេខ ភ្នំពេញ 2BV-5991 បើកបរពីត្បូងទៅជើង ចំណែកម៉ូតូម៉ាក SCOOPY ពណ៌ខ្មៅ ពាក់ផ្លាកលេខ ភ្នំពេញ 1JK-0936 បើកបរដោយបុរសដឹកជញ្ជូន នៃក្រុមហ៊ុនឯកជនមួយ បានធ្វើដំណើរក្នុងទិសដៅ ពីជើងទៅត្បូង ដោយសារមេឃកំពុងភ្លៀង ហើយផ្លូវរអិលផងនោះ ទើបធ្វើឱ្យម៉ូតូនិងរថយន្តបុកគ្នា បណ្តាលឱ្យភាគីខាងម៉ូតូ ដួលបោកក្បាលនិងថ្នល់ ស្លាប់ភ្លាមៗនៅកន្លែងកើតហេតុ៕