ខណ្ឌដង្កោ ៖ បុរសជាប្តី បានដួលបោកក្បាល ស្លាប់ភ្លាមៗ និងស្ត្រីជាប្រពន្ធ បានរងរបួសធ្ងន់ ដោយសារ ជិះម៉ូតូឌុបគ្នាចេញពីផ្ទះទៅធ្វើការ ក៏ទាក់ដៃចង្កូតជាមួយ ម៉ូតូមួយគ្រឿងទៀតបណ្តាលឱ្យដួល កាលពីវេលាម៉ោង ៦និង៣០ នាទីព្រឹកថ្ងៃទី ១១ ខែកញ្ញា ឆ្នាំ២០២៣ ស្ថិតនៅតាម បណ្តោយផ្លូវបេតុង ព្រៃស ក្នុងភូមិត្រពាំងចក សង្កាត់ព្រៃវែង ខណ្ឌដង្កោ រាជធានីភ្នំពេញ ។

មុនដំបូង គេឃើញស្ត្រីម្នាក់ ជិះម៉ូតូម៉ាក Wave ពណ៌ខ្មៅ គ្មានផ្លាកលេខ តាមបណ្តោយផ្លូវព្រៃស ក្នុងទិសដៅពីលិចទៅកើត ខណៈមកដល់ចំណុចកើតហេតុ ក៏មានប្តីប្រពន្ធ ២នាក់ បានជិះម៉ូតូម៉ាក ហុងដាឌ្រីម សេ១២៥ ពណ៌ខ្មៅ ពាក់ផ្លាកលេខ ភ្នំពេញ 1CC-8860 ឌុបគ្នាយ៉ាងលឿន រួចក៏ទាក់ដៃចង្កូ តជាមួយម៉ូតូ Wave បណ្តាលឱ្យបុរសជាប្តី បានដួលបោកក្បាល ស្លាប់ភ្លាមៗ ចំណែកប្រពន្ធ រងរបួសធ្ងន់ធ្ងរ ដោយឡែក ភាគីម្ខាងទៀត រងរបួសស្រាល ។ សពបុរសរងគ្រោះ មានឈ្មោះ មួង ផុន អាយុ ៤៣ឆ្នាំ និងមានឈ្មោះ ស៊ីវ ធីនី អាយុ ៤០ឆ្នាំ រស់នៅភូមិស្រែគូ ឃុំជាងទង ស្រុកត្រាំកក់ ខេត្តតាកែវ ។ ចំណែកម្ចាស់ម៉ូតូ Wave មានឈ្មោះ ព្រំ ស៊ុនរី ភេទស្រី អាយុ ៤២ ឆ្នាំ មានស្រុកកំណើត នៅភូមិរៃខាងជើង ឃុំក្រោលគោល ស្រុកស្វាយជ្រំ ខេត្តស្វាយរៀង៕