ខណ្ឌឫស្សីកែវ ៖ មនុស្សប្រុសស្រីជាង ២០នាក់ បានដួលសន្លប់ ជាបន្ដបន្ទាប់ ត្រូវបាន ដឹកយកទៅមន្ទីរពេទ្យ ដើម្បីសង្គ្រោះបន្ទាន់ ក្នុងករណី ផ្ទុះធុងឧស្ម័នអាម៉ូញ៉ាក់ ចេញពីក្នុងរោងចក្រ ផលិតទឹកកក មួយកន្លែង យីហោ ឈាង មួ នៅជាប់បណ្ដោយ ផ្លូវបេតុង ក្នុងសង្កាត់ច្រាំងចំរេះ ខណ្ឌឫស្សីកែវ កាលពីវេលាម៉ោង ៧ និង៣០ នាទីយប់ ថ្ងៃទី១ ខែកញ្ញា ឆ្នាំ២០២៣ ។

ប្រជាពលរដ្ឋ ដែលនៅកន្លែងកើតហេតុ បានឱ្យដឹងថា រោងចក្រផលិតទឹកកក យីហោ ឈាង មួ កំពុងដំណើរការផលិតទឹកកក និងមានកម្មករ ធ្វើការជាធម្មតា ស្រាប់តែ ផ្ទុះធុងឧស្ម័ន អាម៉ូញ៉ាក់ បង្កឱ្យសាយភាយ ពេញតំបន់ក្បែរៗនោះ បង្កឱ្យមាន អ្នកដួលសន្លប់ ជាច្រើននាក់ ខណៈដែលអ្នកខ្លះដឹងខ្លួនទាន់ ក៏រត់ចេញពីតំបន់នោះ រកកន្លែងមានសុវត្ថិភាព ព្រោះធំក្លិនចំហាយមិនបាន និងអ្នកខ្លះទៀត រត់ចេញមិនទាន់ ហូរទឹកភ្នែក ពិបាកដកដង្ហើម ក៏ដួលសន្លប់ទៅ៕