ខណ្ឌមានជ័យ ៖ បុរសម្នាក់ ជិះម៉ូតូធូដេឆ្លងផ្លូវ ត្រូវម៉ូតូហុងដាឌ្រីម បើកបរក្នុងល្បឿនលឿន ជ្រុលទៅបុកពេញទំហឹង បណ្តាលឱ្យ អ្នកបើកម៉ូតូ រងរបួសធ្ងន់ទាំងសងខាង កាលពីវេលាម៉ោង ១១និង៣០ នាទីយប់ ថ្ងៃទី១៥ ខែសីហា ឆ្នាំ២០២៣ នៅចំណុចភ្លើងស្តុប លូប្រាំ តាមបណ្តោយផ្លូវចោមចៅ ស្ថិតក្នុងសង្កាត់ ស្ទឹងមានជ័យទី៣ ខណ្ឌមានជ័យ។

មុនពេលកើតហេតុ គេឃើញបុរសម្នាក់ ជិះម៉ូតូម៉ាកធូដេ ពណ៌ស ពាក់ស្លាកលេខ ភ្នំពេញ 1FY-3295 តាមបណ្តោយផ្លូវចោមចៅ ក្នុងទិសដៅពីកើតទៅលិច មកដល់ចំណុចកើតហេតុ ក៏បានបត់ឆ្វេងឆ្លងផ្លូវ ដល់ពាក់កណ្តាលផ្លូវ ស្រាប់តែមានបុរសម្នាក់ ជិះម៉ូតូហុងដាឌ្រីម ពណ៌ខ្មៅ គ្មានស្លាកលេខ ក្នុងទិសដៅពីលិចទៅកើត ក្នុងល្បឿនលឿន ជ្រុលទៅបុកពេញទំហឹង បណ្តាលឱ្យរងរបួសធ្ងន់ ទាំង ២នាក់ ចំណែកម៉ូតូ រងការខូចខាត យ៉ាងដំណំ៕