ខណ្ឌសែនសុខ ៖ ក្របីមានកូនក្នុងផ្ទៃ មួយក្បាល កំពុងដើរឆ្លងផ្លូវ ត្រូវរថយន្ត ឡិចស៊ីស KURU 570 បុកពេញទំហឹង រងរបួសបាក់ជើក ហើយរថយន្ត រងការខូចខាតយ៉ាងដំណំ កាលពីវេលាម៉ោង ១០ យប់ ថ្ងៃទី១៥ ខែសីហា ឆ្នាំ២០២៣ ស្ថិតនៅតាមបណ្តោយផ្លូវ ៤០ ម៉ែត្រ ខាងក្រោយ សាលាសង្កាត់ក្រាំងធ្នង់ ក្នុងសង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ។

មុនពេលកើតហេតុ គេឃើញរថយន្ត ឡិចស៊ីស KURU 570 ពណ៌ខ្មៅ ពាក់ស្លាកលេខ ភ្នំពេញ 2BQ- 8808 បើកតាមបណ្ដោយផ្លូវ ៤០ ម៉ែត្រ ក្នុងទិសដៅ ពីលិចទៅកើត មកដល់ចំណុចកើតហេតុ ស្រាប់តែមាន សត្វក្របីញីមួយក្បាល បានដើរឆ្លងផ្លូវ បណ្ដាលឱ្យរថយន្ត ទៅបុកពេញទំហឹង បណ្តាលឱ្យក្របី រងរបួសនៅលើផ្លូវ រីឯរថយន្ត រងការខូចខាត យ៉ាងដំណំ ផ្នែកខាងមុខ ។ ក្រោយពេលកើតហេតុ កម្លាំងសមត្ថកិច្ច បានចុះមកពិនិត្យ ហើយចុងក្រោយ ម្ចាស់រថយន្ត បានយករថយន្ត ទៅជួសជុលដោយខ្លួនឯង ព្រោះរកមុខម្ចាស់ក្របី មិនឃើញ៕