ខណ្ឌដូនពេញ ៖ រថយន្តស៊េរីទំនើប ពាក់ផ្លាកលេខ ខេមរភូមិន្ទ បើកទៅបុករបាំងថ្ម ពុះចែកទ្រូងផ្លូវ លាន់ដូចរន្ទះ បង្កការភ្ញាក់ផ្អើល កាលពីវេលាម៉ោងជាង ១២ រំលងអធ្រាត្រ ឈានចូល ថ្ងៃទី២ ខែសីហា ឆ្នាំ២០២៣ ស្ថិតនៅតាមបណ្តោយវិថី ព្រះមុនីវង្ស ត្រង់ចំណុច ស្តុបសេរីភាព ក្នុងសង្កាត់ផ្សារថ្មី២ ខណ្ឌដូនពេញ រាជធានីភ្នំពេញ។

រថយន្តបង្ក ម៉ាកឡង់គ្រីស័រ ពណ៌ស មានផ្លាកលេខ ខេមរភូមិន្ទ 09. 2-9060 ធ្វើដំណើរ ជាលក្ខណៈគ្រួសារ បើកបរក្នុងល្បឿនលឿន មកដល់ក្រោម ភ្លើងស្តុបសេរីភាព បានបួងចង្កូត ជ្រុលទៅបុក របាំងថ្មពុះចែកទ្រូងផ្លូវ ខូចខាតអស់ ០២កង់ ចំណែករថយន្ត ខូចខាតនៅផ្នែកខាងមុខ បែកកញ្ចក់ ផ្ទុះពោងការពារសុវត្តិភាព បែកកង់ដាច់កាឡេ ចំណែកអ្នកបើកបរ បានរងរបួសធ្ងន់ ត្រូវបានរថយន្តសាមុយ ដឹកបញ្ជូនទៅមន្ទីរពេទ្យ ដើម្បីសង្គ្រោះបន្ទាន់៕