ខណ្ឌពោធិ៍សែនជ័យ ៖ បុរសជនជាតិចិន ពើករថយន្តក្នុងល្បឿនលឿន ជ្រុលទៅបុក ម៉ូតូពីក្រោយ បណ្តាលឱ្យ ២នាក់ ឪពុកកូន រងរបួស ធ្ងន់និងស្រាល ហើយរថយន្តបង្ក បានព្យាយាមបើករត់ ទៅបុករ៉ឺម៉កកង់បី ពីក្រោយទៀត បណ្តាលឲ្យក្រឡាប់ផ្ងារជើង កាលពីវេលាម៉ោង ៦ ល្ងាច ថ្ងៃទី១៤ ខែកុម្ភៈ ឆ្នាំ២០២៣ នៅចំណុច ស្ថានីយប្រេងឥន្ទនៈ Ptt តាមបណ្តោយ ផ្លូវជាតិលេខ៣ ភូមិព្រៃព្រីងត្បូង២ សង្កាត់ចោមចៅទី៣ ខណ្ឌពោធិ៍សែនជ័យ។

មុនពេលកើតហេតុ គេឃើញ ម៉ូតូស្គូពី ពណ៌ស ពាក់ស្លាកលេខ ភ្នំពេញ 1JV-7203 ឌុបកូនតូចម្នាក់ បតាមបណ្តោយ ផ្លូវជាតិលេខ៣ ក្នុងទិសដៅ ពីជើងទៅត្បូង ស្រាប់តែមាន រថយន្តម៉ាកព្រូស ពណ៌ទឹកប្រាក់ ពាក់ស្លាកលេខ ភ្នំពេញ 2AS-2976 បើកដោយបុរសជនជាតិចិន មកពីក្រោយ បុកពេញទំហឹង បណ្តាលឱ្យ អ្នកជិះម៉ូតូ រងរបួសបាក់ជើងម្ខាង ចំណែកកូនតូច រងរបួសស្រាល។ រថយន្តបង្ក ក៏បានបើកគេច បានប្រហែល ២០០ម៉ែត្រ ជ្រុលទៅបុករ៉ឺម៉ក លក់ខោអាវជជុះ ក្រឡាប់ផ្ងារជើង ហើយបើករត់ បានប្រហែល ១គីឡូម៉ែត្រ ទើបពលរដ្ឋដេញឃាត់ចាប់បាន៕