ខណ្ឌមានជ័យ ៖ បុរសម្នាក់ បានរងរបួសធ្ងន់ ដោយសារ រថយន្តហាយឡេនឌ័រ ដឹកភ្ញៀវជនជាតិ បរទេសប្រុសស្រី ២នាក់ បុកជាមួយម៉ូតូ ផ្លោងមកលើចិញ្ចើមផ្លូវ បង្កការភ្ញាក់ផ្អើល កាលពីវេលាម៉ោង ១០និង២០ នាទីយប់ ថ្ងៃទី៣០ ខែមករា ឆ្នាំ២០២៣ នៅតាមបណ្ដោយ ផ្លូវឌួងងៀប កែងនឹងផ្លូវប្រឡាយលូ ស្ថិតក្នុង សង្កាត់អូរបែកក្អម ខណ្ឌសែនសុខ ព្រំប្រទល់ សង្កាត់ ស្ទឹងមានជ័យទី៣ ខណ្ឌមានជ័យ រាជធានីភ្នំពេញ។

មុនកើតហេតុ គេឃើញរថយន្ត ហាយឡេនឌ័រ ពណ៌ស ពាក់ផ្លាកលេខ ភ្នំពេញ 2AO-6546 ធ្វើដំណើរ តាមបណ្ដោយ ផ្លូវឌួងងៀបក្នុង ទិសដៅ ពីត្បូងទៅជើង បានជ្រុលទៅបុក ជាមួយម៉ូតូ ម៉ាក Yamaha សេរ៉ូស ពណ៌ខ្មៅ លាយក្រហម ពាក់ផ្លាកលេខ ភ្នំពេញ 1HF-5412 ជិះដោយបុរសម្នាក់ តាមបណ្ដោយផ្លូវបេតុង ប្រឡាយលូ ក្ទងទិសដៅ ពីកើតទៅលិច ចំពីចំហៀងពេញទំហឹង បណ្ដាលឱ្យម៉ូតូ ផ្លោងទៅលើចិញ្ចើមផ្លូវ បែកបាក់ ខ្ទេចស្ទើរទាំងស្រុង ចំណែកម្ចាស់ម៉ូតូ រងរបួសធ្ងន់ ត្រូវបានរថយន្តសាមុយ ដឹកយកទៅសង្គ្រោះ នៅឯមន្ទីរពេទ្យភ្លាមៗ៕